Rusiya Federasiyasının miqrasiya qanunvericiliyinə edilən bəzi dəyişikliklər və əlavələr haqqında məlumat.

1 yanvar 2014-cü il tarixində Rusiya Federasiyasının miqrasiya qanunvericiliyinə edilən bəzi dəyişikliklər və əlavələr qüvvəyə minmişdir.

Qanuna edilən dəyişikliklərin ən əsası isə Rusiya ərazisində müddətli yaşamaqla bağlıdır. Bildiririk ki, əvvəllər Rusiya ərazisində 90 gün qaldıqdan sonra Rusiyaya giriş üçün viza tələb olunmayan ölkələrin vətəndaşları Rusiya ərazisini tərk edərək, dərhal Rusiya ərazisinə geri dönə bilərdilər və yenidən üç ay müddətinə qeydiyyata düşərək Rusiya ərazisində məskunlaşıb işləyirdilər.

Qüvvəyə minmiş qanunvericiliyə edilən dəyişikliklərə əsasən, əgər xarici vətəndaş 90 gün müddətində Rusiya ərazisində qalarsa, bundan sonra o, ölkəni tərk edərək 3 aydan (90 sutka) sonra yenidən bu ölkəyə qayıda bilər.

Xarici vətəndaş 180 gün ərzində cəmi 90 gündən artıq Rusiya ərazisində qalarsa, onun Rusiyaya girişinə 3 il müddətində qadağa qoyulur və o ölkədən deportasiya olunur. Federal qanunun tələblərinə uyğun olaraq, xarici vətəndaşlar qanunda nəzərdə tutulan prosedurları yerinə yetirdikdə onların ölkə ərazisində qalması üçün müraciət oluna bilər və o halda onlar miqrasiya idarəsində qeydiyyatdan keçməklə 90 gündən artıq Rusiya ərazisində qala bilərlər. Bu müraciəti əsasən təhsil ocaqları, biznes şirkətləri, dövlət qurumları, tibb ocaqları və.s edə bilərlər. Əgər xarici vətəndaş işləmək üçün müraciət edərsə, o halda xarici vətəndaş üçün vergi hesabı açılacaq və o əldə etdiyi gəlirdən vaxtı-vaxtında vergi ödəməli olacaqdır.

Yeni qanunla xarici tələbələr də işləmək hüququ əldə edir. Xarici tələbə istər oxuduğu müddətdə, istərsə də tətil zamanı əmək fəaliyyəti ilə məşğul ola bilər. Bu zaman tələbələrlə əmək müqaviləsi bağlanılır və onlar vergi qeydiyyatına alınmaqla, vergi ödəməlidirlər.

Rusiya Federasiyasına təhsil almaq məqsədilə gələn tələbələrin miqrasiya qeydiyyatını isə oxuduqları təhsil ocaqları həll edir. Müalicə məqsədilə RF-yə gələn əcnəbi vətəndaşları bu müddət ərzində müalicə aldıqları tibb müəssisəsi müvəqqəti qeydiyyata götürür.

Miqrasiya qanunvericiliyinə edilən dəyişikliklərlə Federal Miqrasiya Xidmətinin rəsmi internet səhifəsində ( www.fms.gov.ru ) tanış ola bilərsiniz.


cet.az