2022-04-05

Səfir Polad Bülbüloğlu Yeni Zelandiyanın Rusiyaya yeni təyin olunmuş Səfiri xanım Sara Uolşu onun xahişi ilə qəbul etmişdir

5 aprel 2022-ci il tarixində Səfir Polad Bülbüloğlu Yeni Zelandiyanın Rusiya Federasiyasına yeni təyin olunmuş Səfiri xanım Sara Uolşu onun xahişi ilə qəbul etmişdir.

Görüşdə Polad Bülbüloğlu həmkarını təyinatı münasibətilə təbrik edərək, ona müvəffəqiyyətlər arzulamışdır. Həmçinin Rusiya Federasiyasında akkreditə edilmiş diplomatik korpusun duayeni qismində fəaliyyəti, Rusiya XİN-i ilə birgə təşkil edilən çoxsaylı görüş və mədəni tədbirlər barədə qarşı tərəfə məlumat vermişdir.

Azərbaycanla Yeni Zelandiya münasibətlərinə toxunan ölkəmizin Səfiri ikitərəfli əlaqələrin inkişafı üçün geniş potensialın olduğunu diqqətə çatdırmışdır. Bu kontekstdə turizm sahəsində əməkdaşlığın təşviq edilməsinin əhəmiyyəti önə çəkilmişdir.

Həmçinin Polad Bülbüloğlu Prezident, müzəffər Ali Baş Komandan İlham Əliyevin rəhbərliyi ilə rəşadətli ordumuzun qələbəsi nəticəsində həllini tapmış Ermənistan-Azərbaycan münaqişəsi, onun tarixi, aparılmış danışıqlar prosesi, BMT Təhlükəsizlik Şurasının məlum 4 qətnaməsi və digər beynəlxalq təşkilatlar çərçivəsində münaqişə ilə bağlı qəbul edilmiş çoxsaylı sənədlərin mahiyyəti haqqında yeni zelandiyalı həmkarını məlumatlandırmışdır.

Bundan əlavə postmünaqişə dövrü, işğaldan azad edilmiş ərazilərimizdə aparılan genişmiqyaslı bərpa və yenidənqurma işlərinin gedişatı barədə də söz açılmışdır.

Görüşdə regionda baş verən proseslər və maraq doğuran digər məsələlər ətrafında fikir mübadiləsi aparılmışdır.

Sonda Sara Uolşa Azərbaycanın milli baş örtüyü olan kəlağayı, Heydər Əliyev Fondu tərəfindən yüksək səviyyədə çap edilmiş “Zəfər salnaməsi” və “Qarabağ işğaldan əvvəl və sonra” kitabları hədiyyə edilmişdir.

Yeni Zelandiyalı Səfir maraqlı və məhsuldar görüşə görə azərbaycanlı həmkarına təşəkkürünü bildirmişdir.

Arxiv üzrə axtarış